家品紹介－全智能家居只需…

米家床頭燈2，可作型格地燈用。

當社長同 Maru 見到家品男不斷在手機上的小米網店訂購各種貨品，佢哋好擔心… 1. 究竟買緊乜鬼大陸老土嘢番嚟？2. 係咪駛咗好多錢？

家品男懶理佢哋兩個老土怪，宅男嘅品味同浪漫，你哋識條鐵咩？🤣 最後買咗七件貨品，來回順豐櫃幾轉，啱啱四位數字金額，如果買其他牌子，功能唔單止渣啲，仲要幾倍價錢都落唔到樓。

究竟利用小米產品組建智能家居要點做？

首先你一定要買米家智能多功能網關。它是整個智能家居系統的大腦同心臟，連接所有感應器，從它們得到資訊而執行指令。它亦是一個警報器，可以發出高音量警報聲響和不同顏色的亮光。當然家品男不會在此登出照片暴露這個重要中樞的裝設同位置，其實如果你屋企唔係幾千呎上下層，基本上放哪裡都可以和家中嘅感應器保持聯線。

米家門窗傳感器，一開門或窗就會發出訊息。

米家人體傳感器，有人經過就會發出訊息。

米家智能攝影機 1080p 雲台版

小米 x Honeywell 煙霧報警器

米家無線開關

當將所有東西連接起來（唔講唔知小米產品嘅包裝非常環保，安裝過程亦非常用家友善），再將其他小米家電如風扇、機械人吸塵機、空氣清新機等接上家中 WiFi，強大嘅智能家居組合就此形成。

你可以在米家手機程式內編寫不同智能指令和場景，例如：

• 早上出門口自動熄所有家電和開啟攝影機進行家居監控
• 下午室內溫度超過28度開風扇吹植物，要擺動不直吹
• 晚上我出睡房自動開地燈
• 家𥚃有煙霧立刻在手機提醒
• 入房按一下無線開關關上客廳風扇和地燈兼啟動門窗警報
• 回家一入門口自動關閉攝影機

總之數之不盡，天馬行空乜都得。而且全部小米產品都是純白色簡約型格設計，和我們北歐風格家居設計非常配合。

最重要係，買晒成套智能家居系統和家電，都唔夠一個 Dyson Corrale 夾髪器呀陰公⋯ （我唔係同 Dyson 有仇，係佢定位真係好土豪）

家品紹介－Dondondonki 必入手 Item #2

高達有沙薩比，漫畫有史奴比，呢兩個「比」你唔知唔緊要，但係食薯條你一定要識宅卡比 Jagabee！

究竟係過往十年社長同社員食咗幾多杯宅卡比？唉，講呢啲…

由卡樂B出品嘅宅卡比可以話係日本嘅國民薯條，日本隨處都可見到男女老幼食緊，誇張啲講可能每一分鐘係日本都有人食緊。🤣

宅卡比不時都有季節限定味道，古靈精怪乜都有，但係由始至終最經典嘅神級味道，當然係沙律味。雖然同真正沙律完全大纜都扯唔埋，但總之就好味，一食就停唔到，完全失控…神級嘅薯條味，你識就一早發咗達，仲駛係度同我啃薯條！

究竟宅卡比又幾毒？毒到… 香港 Aeon 長期只見價錢牌唔見貨，社員一見有貨 no see 即掃五六杯（雖然因為無防腐劑保質期只有兩個月左右），社長去到 Dondondonki 一開始搵唔到佢發慌！

下次你去 Dondondonki 見到一對男女戴口罩鬼鬼鼠鼠係宅卡比附近就知佢哋係乜水。🤣

家品紹介－Dondondonki 必入手 Item #1

Dondondonki 銅鑼灣店終於開張，香港人復仇式湧入當去咗日本，艱苦經營中嘅大和風旅遊株式會社社長同社員當然係開張後的第一個周末立即去 check it out。

整個店舖氛圍唔錯，不過我哋鍾意佢再亂啲再邋遢跌再地踎啲再騎呢啲，有返日本當地嘅味道，唔好搞到好似 Aeon 朝市特價場咁。

如果我係度介紹你買魚生和牛水蜜桃烏冬杯麵，你唔拆我家品男招牌我都原諒唔到自己，家品唔止家庭用品咁簡單，仲包括埋家的品味。我其中一個宗旨係點樣用幾十蚊活出港生活港品味！

有一年夏天在東京，在某商場巧遇 Lipton pop-up stall 賣水果凍茶，大排長龍，心諗日本人繼珍珠奶茶後又再次少見多怪。不過當日天氣炎熱，水果茶外貌吸引，於是買了一杯飲。隨飲品送了一包冷泡茶包，那才是亮點。

冷泡茶通常都需時，短則兩小時，長則一晚，好處除了透心涼外，還有咖啡因甚少。Lipton 推出冷泡茶包，用常溫水三分鐘沖好，之後加生果冰同 syrup，一杯夏日解渴佳品水果茶就完成。番到嚟香港搵極都搵唔到，終於係 Dondondonki 再遇上，而且有齊各種味道茶包，包括水蜜桃、菠蘿和 Earl Grey。買了水蜜桃味道回家，炎熱下午沖了一杯飲，「謝」一聲整個人溶化，冷氣都慳返。

家品紹介－今時今日磅重係好 Pro

用咗兩日小米風扇，食髓知味，心思思又身痕。近排想買多功能電子磅，前幾日本來想係豐澤買小米體脂計2，發現斷晒貨好沮喪。跟住記起有小米商城，做乜咁老土仲糾纏喺實體店，立刻網購。前日訂貨，今日送貨到屋苑內順豐櫃，和人完全零接觸，我很宅但我很溫柔。HKD 159 包運費，真係平到一個點… 覺得自己好似無俾錢偷咗個磅番嚟。

小米又再次打破平嘢冇好嘢嘅定律，包裝平實環保，磅本身造工非常高水準。先安裝 iPhone app Mi Fit，跟住踩上個磅配對，過程簡單暢順。唔駛半分鐘，個磅完成量度各種身體數據，還會估計你的身體歲數。好彩我未未老先衰，不過情況唔係好樂觀，要努力keep住。Mi Fit 會自動將所有身體數據傳送到Apple Health度，又會監察住你各樣身體數據個趨勢，好Pro，覺得自己個 trend 去緊大迫傑，絕對有鞭策嘅作用。

咁屈機，其他磅仲有人買咩？🤣

家品紹介－完美風扇⋯⋯唔係 Dyson

夏日炎炎，Dyson Pure Cool 風扇遙控打柴，一身大汗回到家，用遙控器開風扇好似抽奬咁，㩒十下有一下得，真係火熱動感 DLS🔥。

本來捻住換遙控器，發覺要幾百蚊，偶然發現用同樣價錢，買到小米 1X 直流企扇。上網爬文，好評如潮，有冇搞錯，一定係打手寫嘅，等我去豐澤買一個回來試一試（舊 Dyson 二手放出）。

包裝非常企理，組裝簡易，以我家品男玩過不少高價位風扇，小米設計和品質完全超出預期… 咁好，消委會真係要點名指摘，咁樣做生意簡直係壟斷市場，邊有人會買其他牌子！

接駁電源開動，用 iPhone app 接上家居網絡。媽的，居然風力有100 檔微調，我以前Dyson 風扇貴十倍，十檔風力都無，仲要最高幾檔太嘈根本用唔着。由手機 app 可以控制所有功能，隨意轉頭、轉向角度選擇、時間制等等，唯一做唔到係叫部風扇行過嚟。小米風扇風力強，但好靜，靜到我初時以為佢壞咗唔識著。

如果你仍堅持話 Dyson 好啲，ok，單挑可能輸俾 Dyson，因為小米冇空氣清新功能。以 Dyson 價錢，可以買五部小米風扇加一部空氣淨化機，仲有二千多元剩，呢個陣容冇得輸啩？

如果你仲係話 Dyson 好啲，你真係需要買一部風扇，因為你個腦熱壞咗。

綠植生活 Day 1

要開始綠植生活，第一步當然是找一棵植物。

園藝其實唔難，最難是找一棵自己心儀嘅盆栽，和自己家裡的風格夾得來。

讓我分享我入手植物嘅好地方。花墟多花款又價錢合理，但品種比較普通，而且好多蠱惑招數谷開花，買回來想長種有難度。

西貢南邊圍有一間名叫「歐洲花園園藝中心」，是德國 self watering planter “Lechuza” 在香港的供應商。它從荷蘭入口各種各樣的奇花異草，供貨給香港各品味花店。唔好以為這些來路貨好貴，係花店賣的確好貴（如 Agnes b flourist），隨時雙倍價錢，但直接由它入手，平到你唔信。那裡的職員超友善，好鐘意盆栽同埋好專業，一啲都唔 pushy，搞搞震無幫襯完全無黑面，仲好熱情送你免費飲品解渴。就算唔買，入去見識下都好，唔好以為玩盆栽只係種蘭花。

歐洲花園園藝中心 Facebook 專頁

家品紹介 － Mesh Router

最近為會社家居無線網絡進行升級，做了不少硏究，爬過不少網文，聽了不少老 sales 吹水，自己親手裝置測試，決定一定要和大家分享整個過程 end to end。

一來我唔想你行同我一樣嗰條冤枉路，二來幫妳辨清身邊嘅家品男遞交嘅家居升級申請書內容嘅真偽。好多男人好似 Steve Jobs 上身，好 techie，好 visionary，好有信心咁準備用幾千元建設區內最快嘅無線網絡。實情係，佢無呃你，佢的確係 Steve Jobs，教主的確係唔識裝屋企個 WiFi。

好多品牌都有出 mesh router，比較可靠同穩定嘅有 Netgear Orbi 和 Linksys Velop。Mesh router 同以前嘅 router 有乜分別？我用嘅上一代 router 行 dual band，分別是 2.4GHz 和 5GHz，2.4GHz 穿透力強但數據傳輸速度較慢，5GHz 則相反，互補不足，但任何時間只能用其中一個 band。屋企越大或越多牆間隔，就需要越多天線越強無線發射功率嘅 router，勁到你夢內可直接上網。你可以加多幾個 router 擴大覆蓋範圍（我試過），但係每一個 router 要用一個獨特 ID，好似安迪1、安迪2等，區與區之間連接唔係咁無縫，上網不穩定兼不時有 IP 衝突，總之成件事唔型囉。

Mesh router 其實同上一代 router 物理學上分別不大，不過 router 同 router 之間識自己傾計協調，一個 ID 通行各區，無縫銜接。Mesh router 有 tri band 同 dual band 之分，前者貴但預留一個 5GHz band 只供 router 們之間傾計交換情報，後者平但係我哋要同 router 們共享一個 5GHz band，可想而知會比較易網絡塞車。不過，有邊個唔知買最貴最多 band 最多個 mesh router 上網就最順咩？要決定 tri 或 dual，就要睇你用家數目和每人上網做乜。如果大家只係 whatsapp gossip 下玩下 Candy Crush 同 Pokemon，dual band 綽綽有餘。如果阿媽 streaming 睇4k韓劇，阿爸係 PS4 Death Stranding 緊，阿女係 YouTube 直播教緊幾百人化妝，阿仔成晚冇出過房忽然慘叫話比幾十個人（網上）圍斬… 你極需要 tri band，同埋一個最貴嘅寬頻 plan。

咁究竟一間屋需要幾多個 mesh router? 有 sales 會話 mesh router 係新技術，兩個 router 互相對射打勻全屋，穿透所有牆壁。如果你真係信佢買咗，你哋兩個將會互相對罵響遍成個商場！上一代 router 遇到嘅接收問題，mesh router 一樣有。好似我嘅例子，客廳擺放一個 router，睡房無訊號。以為買兩個 mesh router 就搞掂，一個擺客廳一個擺睡房，其實係睡房個 router 都係收唔到訊號。點算？我裝修屋企時專登駁咗 Ethernet 由廳入房，兩個 mesh router 可以自己自動用 Ethernet 連接互相協調。另一個方法是買多個 mesh router 放走廊，由廳撞牆彈射入房，mesh router 只需電源不需有線網絡，擺位上有很大靈活性。

咁 Orbi 同 Velop 邊個好啲？講真，各有各好。Orbi 外形可愛，但有主僕機之分。Velop 四四方方不過不失，但冇主僕關係，每一個 node 都隨時坐正，網絡穩定性稍強，加上 dual band 同 tri band 可以混合使用，安裝和擴充更具彈性。

究竟 mesh router 有冇令家居無線網絡好咗？答案係肯定有，如果你裝得啱嘅話。以我個例子，現在一個 router ID 通行全屋兩條 band，全屋都收到訊號，不會靜雞雞轉左去手提數據嘥 data。

最重要，個 mesh router 冇晒天線型仔晒，家居佈置品味立刻提升。🤣

家品紹介 — 德國硬屈機

現在的耳筒多標榜有 Active Noise Cancelling（ANC），簡單解釋物理學原理，音波可互相干擾，效果有兩種，一是互相增強，一是互相抵消，取決於音波之間的相似程度。ANC 就是不斷分析周圍的雜音，然後發放特定音頻抵消。這是一種頗消極嘅降噪方法，加入人造雜音，音樂變得更不清純。追求原音的人較喜愛 Passive Noise Cancelling，但香港戶外噪音實在多，無奈接受 ANC。

家品男試過坊間大部份 ANC，信我，無一個牌子做得完美，聽至愛歌曲，一聽便知分別，好 Dry，好 Flat，首歌嘅生命力無晒，The city is dying bro⋯

在耳機店鋪經常見到一個德國牌子 Beyerdynamic，唔係 BMW 旗下聯乘作品，是一個經典老牌，專門製作耳機和咪高風，現在大部分產品都堅持在德國生產。在二次大戰時它已製作出擁有超卓聲音分析力的耳機，令德軍輕易監聽盟軍無線通訊和破解密碼。有一次在灣仔電腦商場一間店舖，看到有唯一一款無線型號 Aventho Wireless 供客人試聽。放在眾新款 ANC 耳機中很顯眼，一來它外型「懷舊」，二來無乜新功能科技卻是最貴。當然立刻接駁自己 iPhone 試聽，一聽，他媽的⋯ 點解無 ANC 卻可令我感覺好像入咗 soundproof 房，戴咗監聽級耳機，歌曲每粒音符都彈出嚟，咦，耳機原來無線無 amp⋯ 職員識趣無向我說話，因為無 ANC 但我根本聽不到，只是陰陰嘴笑，睇住我毒發身亡。

當時因為我剛剛買了 Sony 所謂旗艦級 ANC 耳機，忍痛放下耳機離開，但職員講得啱，你聽過 Beyerdynamic Tesla 系列耳機，你一世都唔會忘記個感覺。

一年過後，我回到同一店舖，又見到同一職員，所有牌子又出新款 ANC 耳機，唯獨 Beyerdynamic 不見了。我問仲有冇貨，職員話可以幫我訂，其他的不用試聽，無降噪嘅 Aventho Wireless 音質仲贏佢哋成條街。

我失落地遊走，無意行入另一間耳機專門店，只有一四眼少女睇鋪，玩緊手機。我在貨架上發現全新 Aventho Wireless 減價清貨，望著發呆，少女忽然說話：「這個最靚聲，我聽過晒，Bose 同 Sony 都無得比，B&O 貴得個樣，好多客指名只聽 Beyerdynamic 耳機。」估唔到少女咁有監聽閲歷同品位，立刻對她另眼相開，叫她立刻拿新貨出來給我。

臨走時少女問我聽開咩耳機，我話 Sony Bose KEF B&O 等等聽過晒，全部給 Beyerdynamic 比下去。少女話煲下可能好啲，我話煲極都係垃圾，少女有共鳴地笑出來。最後我說我有一個耳機比得上，少女立刻問咩牌子，我話 Audeze，少女話唔怪之得，我同少女都承認用無線 Beyerdynamic 硬拼有線有amp Audeze 有啲唔 fair 囉。

家品紹介 – 設計就是魔鬼

罐頭刀周街都有，有平有貴，來自瑞士的 Kuhn Rikon 罐頭刀有何特別？

罐頭刀其實有大學問，今次家品男介紹這個拿了專利和不少世界設計大獎的安全罐頭刀，亮點有以下：

• 開罐頭時罐頭刀任何部分都不會和罐內食物有任何接觸，不會污染食物，又不會弄髒罐頭刀。
• 開罐頭無需用力，輕鬆扭扭便可。我第一次用以為自己夾錯位，因為太易扭，但扭幾下真係開到罐頭。
• 最後一點亦是其精秒所在，開出來的蓋和罐身的邊完全不𠝹手，蓋還可以放回繼續用罐頭存放未吃完的食物。開了無數罐頭，第一次覺得開完個罐頭可以攞係藝術博物館展覽。用相片比較容易説明佢開罐頭開得有幾完美。

你可能會見過類似但平很多的版本，但那些是抄襲專利設計，買抄襲品是對想出此精妙設計的原創者是一大侮辱。所以如果你受家品男感動，希望你買 Kuhn Rikon 原裝正版，各大百貨公司家品部都可輕易找到。

設計就是魔鬼，因為魔鬼通常都在細節𥚃。

開咗嘅罐頭，可見蓋和罐頭無變形無損傷，簡直是一件藝術品。

近距離看到蓋邊有幾 smooth，完全不𠝹手。

蓋可以完美放回罐頭上，罐頭好像未開過，變成密封食物盒。

家品紹介－鬚刨都打贏剃刀？

家品男同鬚嘅戰鬥，從來未停止過。幾日無剃鬚，即刻變耶穌。

各種類品牌戰鬥工具，我都試過，電鬚刨和剃刀，各有利弊。最近終於找到差不多是完美的電鬚刨，就是 Philips S9000 Prestige。

剃刀剃得夠貼，但易令皮膚敏感，而且替換刀片一點都不便宜。不說不知，全世界只有數間廠房可製造剃刀刀片，因為所需機器非常專門。

電動鬚刨主要分兩大類，刀膜和旋轉。刀膜型比較常見，旋轉型主要來自 Philips。刀膜型我用過兩隻牌子，分別是 Braun 和 Panasonic，型號是 Series 9 和 Lamdash，有自動清洗功能。它們都剃得好，但不夠貼。自動清洗衞生方便，但清洗藥水（Braun 的令酒精而 Panasonic 的是用水開）慢慢會侵蝕機身，令部分位置，機能不受影響，但唔靚囉。

有一天理髪時，看一本日本男性雜誌介紹 Philips 最新電鬚刨，外型吸引兼可無線差電，非常吸引，家品男有啲上釣。初時由剃刀轉回電鬚刨有點猶豫，但網上一致好評，唯一缺點是價錢。剛巧剃刀刀片用完，立即取得社長 approval，買了 Philips S9000 Prestige 回來。

首先包裝很靚，設計又環保，unbox 時以為自己拆緊 iPhone。原裝 case 好靚，無線充電版好型，除了叉鬚刨還可叉其他對應 Qi 的電子用品。

鬚刨拿上手，好輕，還以爲自己忘記入電池，原來本身已內置鋰電池。手感好，運作時沒有太大振動，不似 Braun 振到全身打冷震。真係剃得好貼，我從來無諗過電鬚刨可以剃得咁貼，用了幾天，可以確定唔係幻覺。剃得利落但皮膚又感覺舒服，相比之下，剃刀有時未瞓醒用力不當真係會見紅。乾濕剃都試過，一樣剃得貼，就算乾剃，只要刀頭沾一沾水便可在面上暢順遊走。因為全機身防水，所以可以一邊沖涼一邊剃鬚都得。清潔很簡單，水喉下沖一沖就乾淨。成個刀頭可以拆下，換其他頭如旋轉毛刷頭。

剩係睇住佢叉電已經好治癒🤣