家品紹介－洗衣機皇

洗衣機平日無事無幹存在感非常薄弱，有事時就好像世界末日。試想像所有濕透內衣褲被鎖在洗衣機內，簡直令人崩潰。

我幾肯定每個人一生中一定試過換洗衣機，因為洗衣機壞嘅機會率亦非常高，我自己都換過幾次。市面上洗衣機種類牌子多不勝數，各花入各眼，但講到洗得最乾淨最硬淨最實而不華，一定係 Miele。

用了 Miele 洗衣機差不多一年半，我覺得係時候可以對佢評價：

• 佢唔 spin 正常運轉時好靜，我成日以為佢無開機。當各牌子標榜用 inverter 摩打更寧靜，Miele 已經低調轉用咗 inverter 摩打 N 年。
• 佢個不鏽鋼內膽簡直係一件藝術品，好重金屬，傳說中嘅蜂巢面平滑溜手。Miele 話洗絲襪不用洗衣袋都無問題，我試過，真係零損傷。佢係第一部洗衣機令我覺得衫係會越洗越靚，因為佢洗得乾淨又不損衣物。
• 佢啲不同模式唔係得個名，係真係有用。例如好多洗衣機都有恤衫模式，話洗完會無咁皺，大部份係廢嘅，無再皺啲已經偷笑。Miele 嘅恤衫模式真係嚇死人，我唔知佢攪啲乜，但洗完恤衫已經約五成熨平，熨衫時間大幅縮短，真係唔親身體驗係難以相信。
• 佢有一個 TwinDos 功能，load 入兩個專用洗衣劑 cartridge，洗衣機就會全自動在適當時候落適量洗衣劑。超好用，洗完啲衫唔駛驚落多咗洗衣液有殘留氣味及導致皮膚敏感，我個人經驗認為係平過自己買洗衣粉。
• 通常洗衣機用了一段時間，內膽有污漬，膠邊有黑霉漬抹極都係度。從相片所見，用了一年半，仲好似新嘅一樣，嚇死人。

最後，我登另一偷拍照片説明，原來部洗衣機懂得同師傅傾計。有一次因為一啲小問題叫師傅上門檢查，師傅不用問我什麼，拿出 laptop 同我部洗衣機深情對話，一下子已經了解晒我嘅洗衣歷史。又一次嚇死人。

讀本紹介－毒物 Kindle

家品男除了喜愛睇電影（曾經試過在同一戲院一晚看兩場電影… 點做？講呢啲…），煲劇（社長令我病情惡化），同埋睇書。

估唔到我係一個文青？

我睇嘅書大部分是英文，偶然中文。喜歡的種類很廣泛，但我承認我膚淺，始終比較喜愛小説。不時會跟風睇下啲潮書，例如宇宙嘅起源、現代民主沒落、大數據、金融危機、歷史名人自傳等等，老實講，大部分好悶。講俾人聽你知道宇宙一開始千分之一秒發生乜事，或者原始人一次大便完唔抹屁股如何導致 Trump 成為美國總統，係好型好有內涵好 charming，但講真我都係鐘意一晚唔瞓睇完 Tom Clancy，sorry 我無資質改寫人類歷史。

以前 paperbacks 買完一本又一本，睇完真係無用放埋一邊，放久了紙張變黃，真的會鑽出書蟲！加上空間有限，隔一段時間就要掉，究竟自己看過什麼書都記不起。Kindle 的出現簡直是我們這些書蟲一大救星，很多年買第一代技術的確未成熟，不過電子紙已經做得很像普通紙，眼睛看得很舒服。兩年前升級 Kindle，新的電子紙解像度更高，touch 反應更快，價格更低，差不多完美。在 Kindle Bookstore 買書平啲，以前買咗嘅書又會自動 update（雖然我好少翻睇改咗啲乜），完全不佔用任何實際空間。

最近經人介紹看村上春樹小說（又扮文青），英文版譯得不錯，雖然我不懂對照日文原著，但英文版文筆不錯，能表現出一個很獨特的意境。我看的是 A Wild Sheep Chase，是中長篇小說，睇了七成，其實故事結構不太複雜，不過很難分類，不似倪匡、亦舒、Dan Brown、Stephen King 等那麼鮮明。

最後介紹一位作家，名叫 Kazuo Ishiguro，是位日籍英國小説作家，廿年前在又一城 Page One 買了他一本短篇小說 When We Were Orphans。最初以為是英譯本，又以為似 Jane Austen，點知一看愛上其文筆，出奇地吸引我，給我感覺有點似電影 Empire of the Sun。誰知2017年他贏得諾貝爾文學獎，所以不要笑家品男太膚淺… 🤣

Oil Burner 紹介－Aesop 是我的朋友

家品男深信在家燒香薰油可以改變氣氛，不問配搭有不同效果。

以前用開無印的電動 disffuser，簡約圓柱式設計，噴出淡淡的煙霧，還可發光。效果唔錯，帶點迷幻，覺得自己去咗 spa。

可是不久前它終於壞了，要買一個新。家品男這方面偏向老土，喜歡點蠟燭 burner，可惜無印不再賣，主力傾銷一大一小迷幻煙霧器。越唔俾家品男揀，就越要買傳統神燈，但不知為何周圍都封殺只賣電動 diffuser。

前幾天收到 Aesop 電郵，它是少數我還未 unsubscribe 的 direct mailing，因為它的 DM 很失敗，不是推銷產品，而是講生活點滴。從電郵得知高街分店正在舉辦 Henry Wilson Studio 的銅製藝術作品展覽，當中有一個 Brass Oil Burner，簡直一見鐘情，星期日一早立刻去看看。

我到達時剛剛開鋪，一外藉店員招呼我，一搭訕就傾足十分鐘，完全同 Aesop 產品無關，就剩係講個 oil burner。每一個都是手造，隨著時間慢慢氧化外表出現變化，所以每一個外表都是獨一無二。當我很興奮拿著 oil burner 準備離開時，店員問我今天有什麼做，我説今晚會煮 gnocchi，自製 veggie saucing，又傾多幾分鐘。

我終於知道為什麼我那麼喜愛 Aesop 這品牌，因為它在推銷產品方面做得很失敗，只想和客人交朋友。

體溫計紹介－總有一款啱你心水

最近家品男感染甲型流感，要食足五日特敏福，燒足五日。量體溫次數多到記不到，病到死下死下時發現原來家𥚃有齊各款體溫計，自己親自科學測試分享各款好與壞。不愧是家品男…

從相片看到，我有口探、額探及耳探。首先買體溫計不要慳，一定要買大牌子，除了造工質素有保證，在出廠前會做好 calibration ，量度準確度有保障。

以下是我的用後感：

• 口探：我用的是 Omron，價格是三款中最低，溫度最準確穩定。不過剛吃完東西和飲完嘢不能用，要等一下。量度時間最長，起碼一分鐘。如果一分鐘後溫度還未穩定下來，它會繼續量度，直至讀數維持幾秒不變。隨時有可能含足幾分鐘。對於小朋友或大人，簡直是耐性大測試，真係火到想咬斷體溫計！另外鼻塞時要用口透氣時，用口探其實會影響準確度。
• 額探：我用的是 Braun，價格和耳探差不多，可以接觸或非接觸探測溫度。雖然看似兒嬉，但其實都頗準確，如果非接觸更不用每次清㓗。可是如果曾經洗澡或出外，便要等約二十分鐘才可量度體溫。它有靜音模式，所以非常適合晚上量度小朋友體溫又不用弄醒他。
• 耳探：我用的是 Braun，個人最喜愛，量度快而準。Braun 比其他牌子優勝的地方，它會預熱探嘴，提高準確度，亦能因應年齡調整發燒溫度區域，用紅黃綠表示低中高燒，病到頭昏腦漲時頗有用。唯一麻煩地方是要定期換嘴套，保持衛生。

家品紹介—完美的雪糕球

家品男再次挑戰你對生活要求嘅極限，為咗一個雪糕球你可以去到幾盡？🤣

在家𥚃吃雪糕，一碗幾個圓圓雪糕球好開心，不只是視覺上享受，對控制卡路里吸收亦有幫助，因為可用幾多個「波」來控制食量。

要輕鬆勺出一個完美的雪糕球，你需要一個好 ice cream scoop。

普普通通用一個鐵匙都可以勺雪糕，但很多時會出現超自然現象，匙彎了。你亦可待雪糕軟一點才勺，但這樣吃雪糕時很多已溶化，變成食 milk shake。

專用 ice cream scoop 其實主要分兩種，一種是機械式，勺然後手掌一夾擠出一個雪糕球。效果不錯，但清洗麻煩，要勺出一個完美 3D 雪糕球需要技巧。另一種是一個一體化勺，我喜歡後者，大部分雪糕店和餐廳都選用這種。易清潔，但勺出來的雪糕球質素很取決於勺的型狀，所以不同牌子係有分別。

當你 google 「ice cream scoop」，你會見到大量 Zeroll 雪糕勺，Zeroll 是大家公認雪糕勺的皇者。

用 Zeroll 唔知點解在雪糕上勺幾下，就能輕易勺出一個完美的雪糕球。其實它內𥚃有液體，令手掌的熱力傳到個勺，令勺微暖可輕鬆括出雪糕，亦令雪糕球輕易跌出來。

你還記得你上一次食自助餐，起勢狂勺 Movenpick 雪糕，你之所以能滿載而歸很大機會全靠那 Zeroll ice cream scoop。

香港不易找到 Zeroll，有興趣可 PM 我。😉

風筒紹介－成也 Dyson，敗也 Dyson

Dyson 就好似女友一樣，總會浪費你青春金錢時間，但就係有一樣嘢令你死心塌地，硬係不斷俾機會佢。

Dyson 呢一樣嘢就係風筒。

你可能話我家品男 out，人地卷髮神棍都出埋，風筒就嚟係 outlet 賣，你宜家先講。Sorry 我錯，用咗兩年半先寫用後感，但我起碼唔係吹幾分鐘寫一篇好評然後退番俾 Dyson。

老實講，我買咗之後，真係唔敢話俾人知，因為用咁嘅價錢買一個風筒，你話變態低能我都無話可説。社長真心了解我嘅家品痴，再加上佢心知實用得多過我兼一個仙都唔駛出，所以好體貼陪我去店鋪送我一程。

Dyson Supersonic 風筒雖然貴，但我覺得是所 有 Dyson 產品中最物有所值，因為到現時為止沒有其他品牌推出類似產品，你亦可以話無生產商會為風筒大費周章。

究竟 Dyson 風筒有乜好？

• 風力強－雖然佢嘅風扇風力令我失望（會在另一部落文章細說），但將同樣科技濃縮到風筒上就不得了。風力雖然強勁源源不絕，但卻不致吹甩頭。經我多年使用，的確比傳統風筒快乾三四成左右。
• 噪音「比較」低－聲量的確比傳統風筒低，但又不致於可以一手吹頭另一手拿著手提講電話。
• 溫度適中－佢會不斷測量風嘅溫度作出微調，熱風溫度的確適中，一路吹同一地方也不會燒著個頭。傳統風筒其實都做到，不過要用你嘅智能加你嘅 sensor 再加你嘅手指不時按冷風掣，朝早唔可以望住自己個衰樣發呆。
• 換嘴－唔好諗多咗，Dyson 風筒幫唔到你一路吹頭一路同人嘴，不過佢嘅設計方便換上不同的吹風嘴。雖然啲風嘴好靚好型，但再提醒唔好嘴落去，因為用完會好熱…
• 清潔方便－風筒好易吸麈積塵，嚴重者有可能變火槍。Dyson 這方面完全超班，抹一抹過圈乾淨晒，下面入風口有不銹鋼過瀘網，風筒內部絕不會積塵。

Dyson Supersonic 風筒用落真係唔錯，顛覆傳統，不過 Dyson 一向挑戰你對生活品味願意付出幾多嘅底線，性價比，同女友太太一樣…講呢啲。

家品紹介—洗米太郎

家品男超級喜愛煮嘢食，中西日主菜甜品都會試，既為生活（因為社長不會煮）又為興趣。

如果有人告訴你香港有又平又正嘅餐廳，佢一係講緊佢阿媽兼 ex 家用，一係佢係嗰間餐廳股東。香港鋪租人工比天高，一餐價錢有幾多可用來買食材大家心知肚明，有係屋企玩開煮飯仔嘅朋友就知唔毒死你已經偷笑，還計較牛肉有冇牛肉味？Come on James…

飯是在家𥚃最常煮的菜式之一，而煮飯其實是大學問。如果那位告訴你香港有又平又正嘅餐廳嘅人，佢唔會自己煮「飯」，或佢無用 IH 電飯㷛，你可以忘記佢所講關於那間餐廳嘅一切。🤣

不過今次重點不是食評，不是煮飯技巧，不是電飯㷛，而是家品… 洗米太郎。

家品男已經忘記一生人洗了幾多次米，洗米係需要啲技巧，而怎樣洗米絕對會影響到飯味同口感。千萬不要直接用電飯鍋洗米，除非它特別註明可以這樣用，輕則加速電飯鍋老化飯容易「痴」底，重則鍋嘅 coating 去咗你個胃。簡單嘅你可以用筲箕開住水喉用手或專用刷（又一家品介紹😂）洗米，方便快捷但浪費食水。傳統方法用個大碗洗，但我最討厭隔水，又慢又難隔得清，又會有些少米倒了出來，粒粒皆辛苦不可浪費，成個過程好 tedious 唔型。

洗米太郎嘅出現 streamline 咗成個 process，洗米變成樂趣。夾佢係碗邊，過水隔米流暢晒，笨拙嘅家品男都零失手。洗米過程時間大大縮短，水過得好清，剩下嘅米乾爽好多，減少水喉水對飯味嘅影響（最後用來煮飯的水最好唔用未過瀘水喉水）。

洗米太郎來自日本，在 Apita 和永安都有售，洗米華至愛！

個人覺得買電飯㷛應該送洗米太郎，好過送 Minion 刀叉或 Puma 毛巾… 🤬

家品紹介—Marna Ecocarat Toast Tray

首先我要紂正，之前兩篇部落文章可能令大家誤以為我係家電男，實則我嘅 scope 更闊，持份者更多，我係 100% 家品男。

今次我介紹一樣不用電的家品。

我很重視早餐，亦喜愛吃多士。很多年已經沒有在外面買麪包，如果你有試過吃自己親手做的麪包，你就會不敢再吃市面上違反自然定律（又輕又甜又大件）嘅無益麪包。今次重點不是麪包，而是盛載多士的碟。多士有好多種，但共通點是都要將麪包加熱，而微烘熱後帶點 crunchy 嘅多士尤如一個吸濕袋，隔一會便變濕軟，口感差了。日本食器品牌 Marna 就針對這問題和 LIXIL 開發了 Ecocarat Toast Tray，它是一塊多孔陶瓷，吸濕能力相等於珪藻土五倍。我本人試用過，多士放在這碟上，一段時間後仍能保持乾爽脆口。故意灑水在碟上，會聽到「謝謝」聲，眨下眼所有水不見了被吸入陶瓷內。用水洗佢仲誇張，沖完水成塊板未抹已經差不多乾晒，重手咗，要真正還完便要將它放入焗爐烘十多分鐘將吸收咗嘅水分蒸發出來。

在香港你可以在 Franc Franc 找到這塊 Toast Tray。當然用萬壽無疆碟都可盛放多士，但氛圍同口感卻是天與地之差別。

你都在 FB 或 IG 登咗咁多飲紅酒同外遊滑雪相，生活品味型像點可以毀於塊 Toast Tray？快啲即刻換衫落街買喇！🤣

熨斗紹介—Smooth Operator

對於仍在職場上奮鬥的 Salary Man（如家品男），一件熨到貼貼服服嘅白裇衫係每日必需品，所以熨衫係家品男另一必修科。

熨斗這些年來科技上其實沒有多大進步，外型上也沒有多大改變。主要分兩大類，有線與無線。因熨斗要夠熱，要用大量電能，所以無線熨斗一係唔夠電一係唔夠耐一係唔夠蒸氣，完全不入流。有線再細分兩種，普通和近年流行的 Steam Generator。普通的連水箱一體化，Steam Generator 則水箱和熨斗分開，用一條氣喉連住，體積較大。圖中的就是 Steam Generator。

家品男認為揀熨斗要考慮以下因素：

1. 重量—看似荒謬，但熨斗其實越重越易熨得平，所以熨衫可以練大隻
2. 功率—功率越大，溫度越高，熱得越快，但偶一不㥀亦會熨得越燶。
3. 蒸氣—蒸氣輸出一定要多，這樣越易熨得平，這代表普通款要不斷加水，都幾麻煩。Steam Generator 有大水箱，蒸氣輸出通常比普通款強勁穩定得多。
4. 溫度控制—有些牌子如 Philips 和 Bosch，已推出人工智慧溫度控制。熨斗因應衣物質料自己調節溫度，放在衣服上幾分鐘都不會熨燶，再不用看衣服 label 幾多「點」較轉盤。
5. 底板—用的物料好，不易熨到出鏡面，在衣服上亦會行走暢順。

用好熨斗熨衣服其實都幾 enjoy ，感覺有如 smooth operator… smooooooooth operator！😉

吸塵機紹介—Dysonの迷惑（第一章）

做家務是一門學問，亦是一門藝術，如果你不認同，可以 skip。

唔係講笑，我吸塵吸咗廿年（唔係用我鼻吸），由「家品男」trainee 開始（即係細個幫阿爸阿媽吸），到「家品男」自己吸自己屋企，我見證住吸塵機嘅進化同演變。我家主子 Maru 是吸塵機反義詞，一身係毛又易甩毛，和有氣管敏感嘅我簡直天生一對。我同毛塵已經近距離戰鬥咗十年，所以我講吸塵，你一定要聽。

如果你對吸塵嘅定義係叫 Maria 做，咁你又可以 skip。因為你叫佢用掃把一日掃五轉，效果好，你又一滴汗都唔駛出，做乜買部吸塵機俾佢玩，電都慳番。

我今回講嘅吸塵係普通塵，唔係塵蟎，彩虹怪們我遲啲先收拾你地。🤣

吸塵機可分為以下三大類：

1. 有線
2. 無線
3. 機械人

#1 同 #2 又可再分以下幾類：

• 傳統塵箱加過濾網
• 紙塵袋
• 無塵袋旋風

先講有線同無線。

可能你會以為全世界只有一間公司做吸塵機，叫做 Dyson。或者你又以為，全世界做吸塵機做得最出色係 Dyson。咁我估你一定無自己吸塵，或無用 Dyson end to end 吸塵。Dyson 嘅 price premium，有一大部分是用於其海量洗腦式 Marketing Campaigns，我個人覺得情況係越嚟越嚴重同過火。

事先聲明，我用過以上所有各款吸塵機，Dyson 和其他牌子都用過，「家品男」呢個花名真係唔係亂改！

比較吸塵機我會留意以下幾點：

• 吸力：你可以 watt 數簡單比較，但亦不是越高越好，因為吸力是否穩定和可調較才最重要。比如吸窗簾，超強吸力反而令你要換過整套窗簾。好嘅氣流導向設計和專門吸頭能充分發揮吸力，大牌子這方面做得比較好。吸力會隨著塵在機內積聚而逐漸減弱，塵袋吸塵機尤其嚴重，旋風式則相對減弱不明顯。有線吸力一定最強，其次是無線，最弱是機械人。
• 機動性：無線一定比有線靈活，有線中 Dyson Ball 已經算跟得最貼，但比起無線還差得遠。例如吸窗簾、窗台或分體式冷氣機機身，用有線吸塵機會比較吃力。
• 排氣：有些吸塵機聲稱使用 HEPA 過瀘網，排出來的空氣比吸入的更乾淨。我試過的確有分別，便宜的用久了會噴出和 Maru 一樣嘅氣味，被同化咗。
• 清潔：吸咗嘅塵始終要清理，塵袋最方便企理。如果你以為 Dyson 可以一㩒個掣整嚿塵彈入垃圾桶，你未免太天真。基本上清理 Dyson 就如同清理化學廢料一樣，要帶口罩，將整個塵箱放入垃圾袋內密封，然後隔著袋打開活門，過程復雜。當然你可以好型咁對著垃圾桶彈開活門，我試過，立刻大咳嗽，然後當晚哮喘發作。Dyson 還有一個問題，就是某些塵箱部件是不能拆出用水清洗，日本大部分牌子可以，衞生好多。
• 音量：Dyson 工程師講過，他們故意不減滅吸塵機操作時的音量，因為用家認為越大聲越代表吸力強勁。Ridiculous！不過我認同，他們的確沒有盡力減少 Dyson 音量，其他牌子如 Miele、Bosch、Hitachi 在減噪方面做得出色好多。我真的不想每次吸塵好似打仗一樣，人犬不寧。

真心講，Dyson 某程度上的確做出咗最出色的吸塵機，我用過有線無線，吸得乾乾淨淨。可是和它其他產品一樣，為了5%嘅改善至完美，顧客要付出超高的金錢代價，使用上要遷就。

舉過例子，Rambo 在第一滴血續集用嘅鈦金屬度身訂造弓和榴彈箭的確好型好靜好完美，但係俾平少少，可以請五個塔利班民兵買五枝翻版 AK47 十萬發彈加一箱手榴彈，係好唔型好山寨，但係破壞力有九成 Rambo，they still get the job done。當然兩個太極端，我鐘意中間位，My name is 男，家品男。🤣

相片透露了我暫時覺得各方面平衡得好的吸塵機，有興趣可 PM 我。

下次我會講機械人吸塵機。