家品紹介 － Mesh Router

最近為會社家居無線網絡進行升級，做了不少硏究，爬過不少網文，聽了不少老 sales 吹水，自己親手裝置測試，決定一定要和大家分享整個過程 end to end。

一來我唔想你行同我一樣嗰條冤枉路，二來幫妳辨清身邊嘅家品男遞交嘅家居升級申請書內容嘅真偽。好多男人好似 Steve Jobs 上身，好 techie，好 visionary，好有信心咁準備用幾千元建設區內最快嘅無線網絡。實情係，佢無呃你，佢的確係 Steve Jobs，教主的確係唔識裝屋企個 WiFi。

好多品牌都有出 mesh router，比較可靠同穩定嘅有 Netgear Orbi 和 Linksys Velop。Mesh router 同以前嘅 router 有乜分別？我用嘅上一代 router 行 dual band，分別是 2.4GHz 和 5GHz，2.4GHz 穿透力強但數據傳輸速度較慢，5GHz 則相反，互補不足，但任何時間只能用其中一個 band。屋企越大或越多牆間隔，就需要越多天線越強無線發射功率嘅 router，勁到你夢內可直接上網。你可以加多幾個 router 擴大覆蓋範圍（我試過），但係每一個 router 要用一個獨特 ID，好似安迪1、安迪2等，區與區之間連接唔係咁無縫，上網不穩定兼不時有 IP 衝突，總之成件事唔型囉。

Mesh router 其實同上一代 router 物理學上分別不大，不過 router 同 router 之間識自己傾計協調，一個 ID 通行各區，無縫銜接。Mesh router 有 tri band 同 dual band 之分，前者貴但預留一個 5GHz band 只供 router 們之間傾計交換情報，後者平但係我哋要同 router 們共享一個 5GHz band，可想而知會比較易網絡塞車。不過，有邊個唔知買最貴最多 band 最多個 mesh router 上網就最順咩？要決定 tri 或 dual，就要睇你用家數目和每人上網做乜。如果大家只係 whatsapp gossip 下玩下 Candy Crush 同 Pokemon，dual band 綽綽有餘。如果阿媽 streaming 睇4k韓劇，阿爸係 PS4 Death Stranding 緊，阿女係 YouTube 直播教緊幾百人化妝，阿仔成晚冇出過房忽然慘叫話比幾十個人（網上）圍斬… 你極需要 tri band，同埋一個最貴嘅寬頻 plan。

咁究竟一間屋需要幾多個 mesh router? 有 sales 會話 mesh router 係新技術，兩個 router 互相對射打勻全屋，穿透所有牆壁。如果你真係信佢買咗，你哋兩個將會互相對罵響遍成個商場！上一代 router 遇到嘅接收問題，mesh router 一樣有。好似我嘅例子，客廳擺放一個 router，睡房無訊號。以為買兩個 mesh router 就搞掂，一個擺客廳一個擺睡房，其實係睡房個 router 都係收唔到訊號。點算？我裝修屋企時專登駁咗 Ethernet 由廳入房，兩個 mesh router 可以自己自動用 Ethernet 連接互相協調。另一個方法是買多個 mesh router 放走廊，由廳撞牆彈射入房，mesh router 只需電源不需有線網絡，擺位上有很大靈活性。

咁 Orbi 同 Velop 邊個好啲？講真，各有各好。Orbi 外形可愛，但有主僕機之分。Velop 四四方方不過不失，但冇主僕關係，每一個 node 都隨時坐正，網絡穩定性稍強，加上 dual band 同 tri band 可以混合使用，安裝和擴充更具彈性。

究竟 mesh router 有冇令家居無線網絡好咗？答案係肯定有，如果你裝得啱嘅話。以我個例子，現在一個 router ID 通行全屋兩條 band，全屋都收到訊號，不會靜雞雞轉左去手提數據嘥 data。

最重要，個 mesh router 冇晒天線型仔晒，家居佈置品味立刻提升。🤣

Home Network Setup 分享

忙碌了幾小時，發覺原來 set up 一個 secured home network 不是那麼簡單。為免有心人像我浪費時間在網上爬文，我在這裡簡單講解我怎樣做。

我本來有一個 Netgear Wifi Router，放在客廳電視旁，經 PCCW ADSL modem 上網。很多東西都用 LAN wire 接駁到 router，有 TV、NAS 和數碼電視解碼器(用來網上遙控錄影)。唯一問題是家面積不大但很多牆，所以在睡房 Wifi signal 接收不好，但 Mac Mini 卻放在睡房。最後想到用 powerline adapter，Mac Mini 經 ethernet 接駁到 router 上網，不用 Wifi。

以上 setup 沒有問題運作良好，直至 Wifi printer、iPad 與 iPhone 的出現。我的 iPad 是 3G 版，但在家裡我喜歡經 Wifi 上網，順暢很多。可是 Wifi signal 在睡房很弱，所以大部份時間只能在客廳使用 iPad。 Wifi printer 在睡房窗邊，時 work 時唔 work。最後決定買一個新 Belkin Wifi Router，加強發射能力，誰知睡房死角位依然存在，在床上不能用 iPad 上網。正準備回鋪頭換貨，買一個發射能力更強的 Router，忽發奇想，究竟可不可以用兩個 Routers 加強 Wifi coverage？立刻上網 google，發現可以做，但我要做的是 wired bridging，不是 wireless bridging。

以前我將 Mac Mini 直接經 powerline ethernet 接駁 Netgear Router，現在我先將 Belkin Router 經 powerline ethernet 連接到 Netgear Router，然後在 Belkin Router 改一些 settings 令它成為一個 access point (i.e. not a DHCP server)。Router settings 要留意以下各點：

1. 將 Belkin Router 的 SSID 改變成和 Netgear Router 一樣

2. Set 定 Belkin Router 的 IP Address 讓它在 Netgear 的 network 以下(我用 192.168.1.2)

3. Netgear Router 的 DHCP IP Address Range 的尾數要大過2，我用11 開始，以免接駁 Netgear Router 的器材與 Belkin Router 撞 IP Address

4. 調整兩個 routers 的 channels 令它們分隔至少 6

當然還有一些微調不能盡錄。經過改動後，睡房 Wifi signal 爆棚，Mac Mini 和 Wifi printer 都可無線接駁到 home network，iPad 與 iPhone 在全屋都可用 Wifi 上網。Wifi device 在家中會因應 signal 強弱自動由一個 router 轉到另一個 router，不會 reset connection，用家完全察覺不到。